Karyl Bertrand asigna pa representá Karibe Hulandes den panel na INTA na Singapur

0
866
Lawyer Karyl Bertrand

 

Mrs Karyl Bertrand

WILLEMSTAD — Dia 4 di yanüari tabata un fecha spesial pa e abogado Karyl Bertrand. Ela  kumpli net 20 aña ku e la huramentá komo e promé abogado dje milenio nobo aki. Karyl Bertrand a kore stage serka Sulvaran & Peterson i na momentu ku el a kaba su estudio e la drenta den servisio di bufete Winkel Soliana & Grul dia 1 di desèmber di 1999, pendiente su huramentashon ku a tuma lugá 4 di yanüari di 2000 komo e úniko ku a hasi esaki e dia ei.

E la laborá na e bufete Winkel Soliana & Grul/ Soliana Bonapart & Aardenburg te 30 di novèmber 2013. Entrante 1 di desèmber 2013 e la lanta su propio bufete kua ta Bertrand Legal & IP Consultancy. Estando riba su mes e la sigui komo abogado i dosente pa e estudio di HBO Legal Assistant i ta duna varios kurso pa kompania i a dal stapnan importante. Mester bisa ku e ta miembro di organisashonnan internashonal manera INTA (International Trademark Association), GALA (Global Advertising Lawyers Alliance), IPCA (Intellectual Property Caribbean Association) i ASIPI (Asosiación Interamericana de la Propiedad Intelectual).

Siendo miembro di e Komishon Anti-Pirateria Latinoamerikano i Karibe di INTA e la keda asigná aña pasa pa dirigí un kongreso na Jamaica den kuadro di strategia pa kombatí pirateria di produkto den Karibe. E kongreso a konta ku partisipashon di entre otro kuerpo polisial, duana i fabrikantenan di Jamaica i huristanan di Jamaica, Merka i Repúblika Dominikana. Despues a sigui un seshon informativo na Kòrsou pa outoridatnan lokal. Tambe ta asina ku aña pasa Karyl Bertrand a kombertí su mes den e promé abogado di Kòrsou ku a hiba un diskurso na e prestigioso Yale Club na New York den kongreso di GALA ku e tópiko Aspektonan Hurídiko di Lansamentu di Kampañanan Promoshonal Global. E presentashon aki ta forma parti di kursonan online post akadémiko pa abogadonan di Merka.

Na 2018 Karyl Bertrand tabata panelista na e kongreso di Merkadeo i Promoshon di Karibe na Jamaica na kua varios kompania, organisashon i huristanan den region a partisipá. Pa lokual ta trata GALA, Bertrand Legal & IP Consultancy ta na e momentunan aki e representante eksklusivo pa e área di Karibe Hulandes i Karyl Bertrand ta kontribuí na diferente publikashon internashonal di GALA tokante aspektonan legal di merkadeo i promoshon den medianan tradishonal i sosial. Tur e último añanan Karyl Bertrand a partisipá na e kongreso di INTA. Mester bisa ku na tur e kongresonan anual di INTA tin semper partisipashon di mas ku 10 mil hurista ku ta akudí for di e 5 kontinentenan rònt mundu.

Na 2017 e kongreso aki a keda organisá na Barcelona. Na 2018 tabata Seattle i 2019 tabata na Boston. Pa lokual ta trata e edishon di 2020 ta asina ku e kongreso aki lo keda organisá na Singapur. Pa Karyl Bertrand e próksimo edishon di INTA lo tin un sentimentu spesial ya ku IPCA (Intellectual Property Caribbean Association) lo tin un panel na INTA.

Den kuadro di esaki e la keda asigna pa representá Karibe Hulandes i hiba un diskurso tokante di Registrashon Sanitario den paisnan di Karibe Hulandes, spesialmente loke ta trata registrashon di remedi i produktonan pa konsumo. Pa Karyl Bertrand esaki ta un momentu históriko, paso semper e la visualisá ku un dia e lo hasi esaki na e kongresonan di INTA representando Kòrsou. A resultá ku no solamente e lo hasi esaki den representashon di Kòrsou, sino pa tur e paisnan ku ta forma parti di Karibe Hulandes.

Ku hopi optimismo e ta mira pa dilanti e echo ku e oportunidat aki a surgi. E kongreso anual di INTA na Singapur lo tuma lugá entre 25 pa 29 di aprel próksimo. Poko ta e kongresonan rònt mundu ku ta klòk mas ku 10 mil partisipashon dje profeshonalnan den nan tereno. Den kaso dje último kongreso di INTA nan a surpasá hasta mas ku 11 mil hurista partisipando.

Pa Karyl Bertrand esaki ta un bon oportunidat pa laga sinti e presensia di Karibe Hulandes/