KOMUNIKADO DI POLIS: 6 mei 2015

Willemstad, Curacao — Plataforma Banda Bou i Warda di polis Barber konhuntamente ta trahando riba un proyekto di Prevenshon di Kriminalidat den bario di Banda Bou.
Despues di nos promé enkuentronan ku a tuma lugá na Sentro di Bario Westpunt i den bario di Barber i Soto nos ta kontinuá ku nos charla di Prevenshon pa bario di Willibrordus i besindario.
Plataforma Banda Bou huntu ku Polis di Barber kier invitá komunidat i organisashonnan di Banda Bou na un anochi informativo.

E anochi informativo ta tuma lugá:

 Dia : Djaweps 07 di mei 2015;

 Lugá: Kleedkamer na vèlt di bala Willibrordus;

 Ora : 19.00 – 21.00 ‘or.

###END###

Tira mentu ku herido

Willemstad, Curacao — Djamars 5 di mei 2015, alrededor di 11’or di anochi, Sentral di polis a dirigí un patruya na un adrès den Kaya Pieda Presioso, despues di a risibí informashon ku un tiramentu a kaba di tuma lugá i tin un persona heridá.   Na yegada di e patruya nan a topa ku e hòmber víktima di 42 aña di edat, drumi abou ku herida di bala na e parti ariba na banda robes di su lomba. For di un investigashon preliminar na e sitio,  e víktima a deklará ku el a keda sorprendí pa dos(2) hòmber deskonosí, un di nan ku un arma di kandela den su man.  Esun ku arma a los algun tiru dirigí riba dje i un bala  a alkans’é na su lomba. Ku ambulans a transportá e víktima pa poliklínika pa tratamentu médiko.  E investigashon den e kaso aki ta kontinuá.

###END###

Ladronisia i kuater sospechoso detené

Willemstad, Curacao — Djarason 6 di mei 2015, alrededor di 04.’or di mardugá Sentral di Polis a dirigí patruya di polis na un negoshi ku ta keda na skina di Blomonteweg/Cubaweg, despues di risibí informashon ku tin un ladronisia tumando lugá einan. Riba kaminda pa e sitio e patruya a haña informashon ku ta trata di kuater(4) sospechoso ku ya tabata bandonando e sitio, tres(3) na pia i unu(1) den un outo pretu.

Durante di un búskeda intenso den área di Buena Vista e agentenan a bin topa ku e vehíkulo pretu i mesora a duna e shofùr òrdu pa para e vehíkulo. E shofùr no a duna oido na esaki i a sigui kore bai.

A start un persiguishon den área di Buena Vista ku a bin terminá den Biminisweg kaminda e shofùr a pèrdè kontròl i aksidentá ku e outo. Durante di un kontròl tantu na e shofùr komo e outo, e shofùr a trata na kore bai i a keda detené. Den e vehíkulo polis a bin haña un kantidat di kaha ku merkansia prosedente di e ladronisia ku a kaba di tuma lugá na e sitio menshoná i a konfiská tur e artíkulonan aki. Siguiendo ku e búskeda di e otro sospechosonan, den Orchillaweg e agentenan a bin topa ku dos(2) hòmber kanando ku kaha den man.

Na momentu di un kontròl a resultá ku ta trata di e mesun tipo di kahanan ku a haña den e outo ariba menshoná. Den Watlingweg a topa ku e di kuater sospechoso ku tambe tabatin mesun tipo di kaha den su poder. A konfiská tur e merkansianan aki prosedente di e ladronisia i a detené e sospechosonan:

• Sh.I.I. nasé na Kòrsou di 35 aña;
• R.Sh.D.L. nasé na Kòrsou di 21 aña;
• M.L. nasé na Hulanda di 15 aña
• J.J.B. nasé na Kòrsou di 19 aña.

A presentá tur kuater(4) sospechoso dilanti di un fiskal ouksiliar ku a ordená nan enkarselamentu pa mas investigashon. E investigashon ta kontinuá.

###END###

Entrada Hudisial

Willemstad, Curacao — Djarason 6 di mei 2015, alrededor di 6’or di mainta, Polis a tene un entrada hudisial den dos(2) kas na respektivamente; Bèshiweg i Barbouquet. Durante di e entrada hudisial na e kas na Bèshiweg a haña i konfiská un arma di kandela i artíkulonan ku ta di importansia pa e investigashon. Relashoná ku esaki a detené un hòmber sospechoso:

 Sh.R. nasé na Kòrsou di 32 aña di edat;
Na e kas na Barbouquet no a haña nada partikular pa e investigashon.
A presentá e sospechoso R. dilanti di un fiskal ouksiliar i el a keda enkarselá pendiente di mas investigashon.

###END###

Tópiko: Tiroteo ku morto.

Willemstad, Curacao — Djadumingu mardugá dia 3 di mei alrededor di mitar di 4, Sentral di Polis a risibí
yamada di un kaso di tiroteo ku a tuma lugá den Den Helderstraat i ku tabatin un
persona herida.