SOUAX, Curacao — Djárason 23 mei 2018, alrededor di 21.47 or sentral di polis a haña notifikashon di un kaso di tiramentu ku a tuma lugá den àrea di Souax.
Na yegada di e promé patruya polisial nan e sitio nan a bin topa ku tres (3) hòmber drumí abou den un negoshi pega na un kas. Dos (2) di e hòmber nan aki no tabata duna señal di bida.
Te kaminda esaki tabata posibel i bou di e sirkunstansianan presente, por a mira
diferente herida di bala den kabes i na e parti ariba di e víktimanan su kurpa. Ambulans a transportá e víktima ku a keda na bida den un situashon di preokupashon pa Poli di SEHOS pa tratamentu médiko.
Alrededor di 23.56 or dòkter di polis a konstatá morto di e dos víktimanan. Riba òrdu di Fiskal di Ministerio Públiko a konfiská e kurpa sin bida di e víktimanan pa mas investigashon.
E prosedura ku ta mantené na dje ta, ku ta notifiká famia via e kanal(nan) legal i ofishal promé i despues di esei por hasi e identidat di e víktimanan públiko. E motibu di e tiroteo aki no ta konosí i ta den investigashon.
Nos ta supliká kualke persona ku ta disponé di informashon ku por yuda den solushon di e kaso aki pa duna polis e informashon aki na telefòn 917(24 ora pa dia) òf 108(number anónimo, kaminda bo anonimidat ta garantisá)
