KOMUNIKADO DI KUERPO POLISIAL KÒRSOU 11 òktober 2015

1225

Investigashon polisial.

WILLEMSTAD, Curacao — Kuerpo Polisial ta realisando un investigashon profundo i rigoroso en konekshon ku keho ku a drenta di un posibel kaso di maltrato polisial.

Djasabra atardi último, un agente polisial ku a kaba di baha warda, a duna di konosé ku e tabata sinti su mes menasa pa motibu ku un persona ku el a detené algun siman promé, lo mester tabata persiguié.

En konekshon ku esaki, un unidat polisial a detené e hòmber aki i a bai warda kuné. For di investigashon preliminar tin indikashon ku e sospechoso akiposiblemente lo a risibí sla – fuera di proporshon- na man di un òf mas agente polisial i mester a risibí atenshon médiko.

Mando polisial a laga inisiá un investigashon inmediatamente, den kua tur personal ku tabata riba e warda ei, a keda ampliamente interogá.

E interogashonnan aki a bin terminá te den oranan lat di awe mardugá, mientras e tim di investigashon forensiko tambe a keda enkargá ku e investigashon tékniko.

Mando polisial ta garantisá ku e investigashon aki tambe ta unu ophetivo i si ta nesesario, lo tuma e medidanan apropiá kontra esun òf esnan ku eventualmente a hasi nan mes kulpabel na e echo aki.