Detenshon pa menasa i destrukshon.
WILLEMSTAD, Curacao — Djasabra 13 di yüni alrededor di 22.00’or, unidat di Rio Canario a detené e hòmber D.J.M. nase na Kòrsou di 43 aña di edat en konekshon ku menasa i destrukshon. E detenshon a tuma lugá na un kas na Kaya Muizenberg. A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon.
###
Detenshon pa lei di opio.
WILLEMSTAD, Curacao — Djabièrnè dia 12 di yüni alrededor di 23.10 di anochi, Bike Team a detené e hòmber J.J.v.L. nase na Hulanda di 23 aña di edat en konekshon ku infrakshon di e lei di Opio. E detenshon a tuma lugá na altura di Wilhelminaplein den Punda. A presentá e sospechoso dilanti di un fiskal ouksiliar, ku a ordená su enkarselamentu pendiente di mas investigashon. Kontinuando ku e investigashon, djasabra dia 13 di yüni a tene un entrada hudisial na kas di e sospechoso i a bin enkontrá mas mariwana, ku huntu ku esnan di e dia anterior a keda konfiská.
###
Detenshon pa “stalking” i destrukshon.
WILLEMSTAD, Curacao — Djabièrnè dia 12 di yüni alrededor di 18.30’or, reshèrshi di VVC (Veel Voorkomende Criminaliteit) a detené e hòmber D.J.S.C. nase na Kòrsou di 26 aña di edat en konekshon ku “stalking” i destrukshon. E detenshon a tuma lugá na e departamentu di VVC na Rio Canario. A presentá e sospechoso dilanti di un fiskal ouksiliar, ku a ordená su enkarselamentu pendiente di mas investigashon.
###
Kòntròl riba establesimentunan di pèrmit.
WILLEMSTAD, Curacao — Djabièrnè dia 12 di yüni, Tim di mantenshon di Rio Canario i Punda huntu ku diferente otro servisio gubernamental manera Brandweer, S.V.B., M.E.O. Duana i Milieudienst a tene kòntròl na diferente establesimentu di pèrmit den area di Suffisant, Muizenberg, Buena Vista i besindario. A kontrolá 19 lokalidat i a sera 8 di nan en konekshon ku diferente kondishon ku e establesimentunan aki no tabata kumpli kuné. E akshonnan aki ta kontinuá.
###
Persekushon ku detenshon.
WILLEMSTAD, Curacao — Djasabra 13 di yüni alrededor di 7’or di anochi, unidatnan di U.S.T. (Unit Speciale Taken) a detené dos hòmber di nashonalidat Hamaikino riba Gosieweg. Durante di un kòntròl ku e tim a tene riba Emancipatie Boulevard, e duo aki a ninga ordu di polis pa para i a sigui kore. Despues di un persekushon den kua e vehíkulo ku e dos sospechosonan aden a bin aksidentá, polis a logra pone man riba nan. Un di e hòmbernan prosedente di Jamaica tabata permanesé ilegal riba nos isla i a keda hiba barak, pendiente di su deportashon. E otro sospechoso despues di a keda presentá dilanti di fiskal ouksiliar, a keda laga den libertat.
###
Plantashon di mariwana deskubrí
WILLEMSTAD, Curacao — E tim di mantenshon di òrdu di Rio Canario durante di nan kòntròl i akshon dia 13 di yüni, a deskubrí un plantashon di mariwana ilegal den Daimariweg. En konekshon ku esaki, a detené e homber H.V.N. nase na Kòrsou di 54 aña di edat i a konfiská e droga. A presentá e sospechoso dilanti di un fiskal ouksiliar, ku a ordená su enkarselamentu pendiente di mas investigashon.
