KOMUNIKADO DI KUERPO POLISIAL KÒRSOU 13 di aprel 2015

1314

Police Curacao logoKontròl general i preventivo.

Djaluna 13 di aprel 2015 den oranan di mèrdia e Tim di Mantenshon di Òrdu Públiko di Otrabanda (THT) a tene kontròlnan preventivo den besindario di skolnan den Otrabanda. Na van Leeuwenhoekstraat e tim para un outo ku tres (3) okupante aden. Durante kontròl a resultá ku papelnan di e outo no ta òrdu, e shofùr no tin un reibeweis i un di e okupantenan no tabatin un identifikashon huntu kuné. A konfiská e outo i a detené e dos okupantenan aki, miéntras ku e di tres okupante tambe a keda detené na momentu ku el a bai trata di stroba polis den su trabou. A bai warda ku tur tres persona na unda despues di un investigashon a duna e shofùr un prosèsverbal i a laga tur tres den libertat. E kontròlnan aki ta kontinuá.

####

Detenshon relashoná ku maltrato.

Djaluna 13 di aprel 2015 alrededor di 00.13’or di mardugá, Sentral di Polis a dirigí unidat polisial na Kaya Trombon pa un kaso di maltrato. E unidat ku a yega na e sitio a papia ku e dama F.M.L. di 19 aña di edat i e la deklará ku su tata F.A.L. a yega kas bou di influensia di alkohòl i a surgi un diskushon entre nan dos. E diskushon a tèrminá den maltrato di e dama di 19 aña di edat dor di su tata. Un otro yu muhé di 28 aña di edat ku a mira e maltrato a bai intervení i e tambe a keda maltratá pa su tata. Na e sitio polis a detené e hòmber sospechoso F.A.L. nasé na Kòrsou di 47 aña di edat relashoná ku e maltrato ariba menshoná. Investigashon den e kaso aki ta kontinuá.

####

Atrako ku herido

Djadumingu 12 di aprel alrededor di 9’or di anochi, Sentral di Polis a dirigí un unidat polisial na Arowakenweg pa un kaso di atrako ku a tuma lugá na un minimarket. Na yegada di e unidat, nan a topa un hòmber ku diferente herida di hagel na su kabes, kara i garganta. For di investigashon preliminar a resultá ku un ratu promé kuater hòmber tur na pretu bisti i tur ku arma di kandela a presentá na e minimarket. Bou di menasa ku arma di kandela a manda tur kliente bai den e minimarket. Un persona ku tabata patras den e minimarket a mira loke ta pasando i na momentu ku e tabata bin dilanti un di e sospechoso nan a los tiru dirigí riba dje. Despues di e akto ei, e sospechosonan a kue e kaha di plaka i bandoná e sitio. E víktima a risibí diferente herida di hagel i a keda transportá ku ambulans pa poliklínika di SEHOS pa tratamentu médiko. Despues di tratamentu e víktima a keda interná den St. Elisabeth Hospital. Un súplika ta bai na esnan ku por tin informashon tokante di e kaso aki, pa tuma kontakto ku polis na 917 durante henter dia òf na e liña 108, na unda bo anonimidat ta keda garantisá. Investigashon den e kaso aki ta kontinuá.