Fiskal Mayó a sinta na mesa ku “Platform Dierenwelzijn Curaçao”

1488

WILLEMSTAD, Curacao — Fiskal Mayó (HovJ) di Ministerio Públiko Kòrsou, sr. Heiko de Jong, a sinta na mesa djaweps mainta ku un delegashon di organisashonan ku ta sali na defensa di bestia riba nos isla.

E delegashon tabata konsisti di Karin Wooning, Mirjan Seppenwoolde i Siegmond van Lamoen. Nan a represent e organisashonan Curaçao Animal Rights Foundation (CARF), Stichting Dierenhulp Curaçao, Stichting Dog, Pets Rescue Curaçao, Kuida Kabai, Resue Paws Curaçao, i-Animal Foundation i Alle Hadoc.

Nan a uni nan mes den e organsiashon “Platform Dierenwelzijn Curaçao”.

E reunion a dura mas ku un ora i a trata varios topiko di interes pa e representantenan di kwido di bestia. OM di su parti a priminti di bai duna atenshon na maltrato di bestia riba su pagina di Facebook. Lo bai mustra a base di Kodigo Penal di Kòrsou ku maltrato di bestia ta kastigabel pa lei.

Tambe di parti OM a priminti di bai duna mas atenshon na e tema ora risibi keho ku suidadanonan ta entregá na polis.
Representantnan di “Platform Dierenwelzijn Curaçao” i Fiskal Mayó a eksperensiá e reunion komo hopi positivo.

A palabrá entre otro ku lo bin un reunion di follow-up pa sigi trata e topiko.