Ladronisia i dos detenshon
WILLEMSTAD, Curacao — Djamars 16 di yüni 2015, alrededor di 07.40’or di mainta Sentral di Polis a risibí informashon ku tin un ladronisia tumando lugá na un hotèl den Langestraat na Otrabanda. E unidat polisial ku a bai na e sitio a hasi un investigashon i patras di e hotèl den Ijzerstraat nan a bin topa un outo ku dos (2) hòmber aden.
Den e vehíkulo aki tabatin un kantidat di artíkulo entre otro: televishon, radio i sèrbètè ku ta prosedente di e hotèl en kuestion. A konfiská e vehíkulo ku tur e artíkulonan aden i a detené e dos okupantenan kual ta e hòmbernan:
- I.A.N.A., nasé na Kòrsou, di 25 aña di edat;
- L.A.B., nasé na Repúblika Dominikana, di 25 aña di edat.
E dos sospechosonan a keda presentá dilanti di un fiskal ouksiliar ku a ordená na enkarselamentu pa mas investigashon.
###
Aksidente di tráfiko ku herido
WILLEMSTAD, Curacao — Departamento di Tráfiko ta investigando e aksidente di tráfiko ku a tuma lugá djaluna 15 di yüni 2015 alrededor di 12.30’or di mèrdia na e krusada Gosieweg /Comanchestraat den kual tabatin un outo polisial envolví.
E vehíkulo polisial tabata bayendo un asistensia i tabatin su sirena i ‘zwaailicht’ sendé. Koriendo riba Gosieweg den direkshon di Rio Canario, aserkando e krusada Comanchestraat un outo manehá pa un dama a sali su dilanti sin duna preferensia ku konsekuensia ku e vehíkulo polisial a bai dal den banda drechi di e outo aki, ku na su turno a bai dal den un otro outo ku tabata biniendo den direkshon kontrali.
Tur tres shofùr a keda leshoná, di kual e dama tabatin leshonnan serio na su kurpa. Ambulans a transportá e tres víktimanan pa poliklínika na unda despues di tratamentu médiko e dama i e agente polisial a keda interná den hospital St. Elisabeth i e di tres shofùr por a bai kas.
###
Kontròl general i preventivo
WILLEMSTAD, Curacao — Djamars 16 di yüni 2015 entre 17.00’or pa 21.00’or Tim di Mantenshon di Òrdu Públiko di Rio Canario i di Punda, UST, konhuntamente ku Duana i personal di seguridat di aeropuerto, a tene un kontròl general i preventivo na Aeropuerto Hato.
A konfiská:
- Foil ku restunan di kokaina
- Sigaria di mariwana
- Kokaina prosesá den tela di paña
- Tres vehíkulo.
A detené:
- Tres (3) hende hòmber pa violashon di Lei di Opio.
A presentá e tres sospechosonan dilanti di un fiskal ouksiliar ku a ordená enkarselamentu di e hòmber J.D. di 30 aña di edat pa mas investigashon miéntras ku e dos otro sospechosonan despues di interogashon a keda lagá den libertat. E kontròlnan aki ta kontinuá.
