Willemstad – Promé Minister Pisas i Gobièrnu di Kòrsou ta siguiendo e situashon den nos region di aserka i ta keda den kontakto kontinuo ku nos partnernan, tantu den Reino komo internashonal.
Den e último dianan por a tuma nota di algun insidente entre avionnan sivíl i militar den e espasio aéreo di Kòrsou. Promé Minister Pisas ta tuma e insidentenan akí relashoná ku seguridat den nos espasio aéreo hopi serio, sigur mirando e riesgonan pa un aksidente.
Despues di kontakto ku Konsul General di Merka na Kòrsou, Minister Pisas a haña konfirmashon ku diferente instansianan di Gobièrnu Merikano, inkluso e Departamento di Estado, U.S. Southern Command, Federal Aviation Administration (FAA) ta papiando ku Dutch Caribbean Air Navigation Service Provider (DC-ANSP) aki na Kòrsou pa prevení ku e tipo di insidente aki lo sosodé atrobe.
Promé Minister Pisas a ser asegurá ku e outoridatnan aéreo i marítimo lo pone debido atenshon na e situashon aéreo sivíl i militar. Spesialmente a ser akordá ku avionnan militar Merikano lo sende nan ‘transponder’ den nos espasio aéreo pa garantisá ku nan ta visibel pa outoridatnan aéreo lokal. Tambe representashon Merikano a tuma kontakto ku vários aerolínea i kompania di krusero pa sigurá ku nan ta debidamente informá tokante e último desaroyonan i ku medidanan ta keda tumá pa mantené un fluho sigur i ordená di trafiko aéreo i marítimo.
Finalmente, Promé Minister Pisas kier enfatisá ku no tin indikashon ku tin un peliger inmediato pa Kòrsou i ta sigui vigilá e situashon debidamente. Minister Pisas ta reafirmá ku e ta pone seguridat na promé lugá i lo sigui informá komunidat na momento ku tin desaroyonan nobo.
