KRALENDIJK/ THE BOTTOM – Djaweps 4 di dezèmber e 2 sospechosonan, R.V.v.H. (36) i A.N.W. (26) den e kaso di asesinato na Saba a presentá dilanti hues. Ta trata aki di asesinato di e bombero Sheldon Johnson. E asesinato aki a shòk i konmoví e pueblo Sabano, i por nota basta interes pa sigui e kaso. Segun fiskal Daan Smits e investigashon ta kasi kla.
Tabatin konekshon di video ku pareha di e víktima, su ruman i demas famia for di Sint Maarten, tambe ku interesadonan na Saba i Kuerpo di bombero Hulanda Karibense (BKCN) na Saba. Abogado Bommel di Sint Maarten a hiba defensa di ámbos sospechoso. Den e kaso aki famia di e víktima tambe a buska un abogado, mr. Roseburg di Sint Maarten.
Mas akusashon
Ministerio Públiko (OM) ta akusá ámbos sospechoso di asesinato, intento di asesinato di e muhé L.C., poseshon di arma di kandela i poseshon di 2046 gram di kokaina. Fiskal a splika ku 80 porshento di e investigashon ta finalisá. Den e próksimo lunanan ainda mester skucha testigunan i investigá telefòn di e sospechosonan. Tambe tin imágennan di video pero ainda no a inkluí esaki den e dosié.
Te ku awor e dosié penal ta konsistí di 800 página i ainda Bommel no a bin ku deseonan pa e investigashon. Si el a pidi pa e haña sufisiente tempu pa profundisá den e dosié. Banda di esaki a graba e sospechosonan den sekreto durante transporte. E abogado ke relato di e kombersashon aki. Hues a remarká ku normalmente no ta hasi esaki.
“E motibu ta ku mi ke diskutí esaki ku mi klientenan. Si nan bisa ku nan no a bisa algu mi mester por verifiká esaki”, Bommel a splika.
Hues a duna e sospechosonan e último palabra, pero nan no tabatin nada di bisa.
A posponé e kaso pa 19 di mart 2026. Esaki tambe lo ta un Pro Forma i lo stipulá e fecha pa e tratamentu den su kontenido. Segun fiskal ku tur probabilidat lo atendé e kaso den su kontenido na mei of yüni di otro aña.
