Update: Kaso di asesinato na Plasa Hariri

2658
Former KPSM police officer N.C.P Van Thijs

 

POLIS Press Release:

Djadumingu 19 di mart 2023 alrededor di 03.18’or di mardugá, Sentral di Polis a risibí
informashon di un kaso di tiramentu ku a tuma lugá na Plasa Hariri/Retonde Palu Blanku.

Un unidat polisial a keda dirigí na e sítio i na su yegada a bin enkontrá un homber drumi
abou ku no ta duna señal di bida.

For di un investigashon preliminar a sali na kla ku pa motibu te ahinda deskonosi lo mester
a tuma luga un tiroteo kaminda e víktima a wòrdu alkansá na parti ariba di su kurpa.
Ambulans ku a yega rápido na e sitio no por a hasi nada mas pa e víktima.

Dòkter di polis a yega na e sitio i a konstatá morto di e hòmber Niven Clemens Patrick Van
Thijs nasé Kòrsou dia 16 augustus 2000.

Na e sitio polis a haña i konfiská e siguiente atikulonan ku ta di importansha pa e
investigashon ;

 un vehíkulo ku e víktima tabata okupá
 un arma di kandela i
 algun kashi di bala (huls)

Kousa di e tiramentu te ainda no ta konosí i investigashon den e kaso aki ta kontinuá.


WILLEMSTAD – Curacao (Fuente: Vigilante) — Polisnan ta investigandó un kaso di ASESINATO i intento di asesinato ku a tumá lugá awe den oranan di marduga aki na Kòrsou. Tabata alrededor di 3:20 di marduga ku sentral di polis a risibí notifikashon di un kaso di tiramentu na Plasa Hariri i ku tin 2 persona herida.

Na yegada di e promé patruya a enkontrá ku un hòmber ku heridá di bala i ku no ta duna señal di bida. Segun promé investigashon, un otro vehikulo lo mester a blòkia e vehikulo ku e hòmber aki tabata aden i aki un òf mas persona a baha for di esaki i lòs diferente tiru dirigí riba e viktima ku resultado fatal. Dòkter di polis a konstatá morto di e viktima na e sitio. Segun indikashon preliminar lo mester ta trata di yu di un agente polisial.

Miéntras polisnan tabata hasiendo investigashon na Plasa Hariri (Palu Blanku), a drenta otro notifikashon ku na Curaçao Medical Center a yega un hòmber, di 19 aña di fam S, ku herida di bala na altura di su barika. Mesora a dirigí reshèrshinan tambe pa CMC pa investigashon den e kaso aki tambe pa sa si entre otro e viktima aki tambe tabata den e mesun vehikulo ku esun ku a ser asesiná na Palu Blanku i ki detayes e por yuda kune pa e investigashon. Polisnan ta hasiendo investigashon den e kaso di asesinato i intento di asesinato aki i ta pidi yudansa di komunidat pa kualkier detayes, por tuma kontakto ku 917 òf e number anonimo 108.

Pas na su alma i forsa na famia di e defuntu.