KOMUNIKADO DI KUERPO POLISIAL KÒRSO: 24 yüni 2015

1086

Intento di ladronisia ku violensia 

WILLEMSTAD, Curacao — Djamars 23 di yüni 2015, alrededor di 23.40’or, Sentral di Polis a risibí notifikashon di un intento di ladronisia ku violensia ku a tuma lugá riba un hòmber na Mayaguanaweg. Mesora a dirigí un unidat na e sitio.

For di un investigashon ku polis a realisá na e sitio, a resultá ku e hòmber víktima tabata koriendo den su outo riba Mayaguanaweg. Dado momento un hòmber deskonosí pa su persona a para su dilanti ku arma den man i a obligá e víktima pa baha for di outo. Na mes momentu un otro hòmber a drenta den e outo i a start un fòrsageo i nan a logra baha e víktima for di e outo.

Den nan intento pa bai ku e outo e víktima a kuminsá grita pa yudansa i esaki a pone ku e sospechosonan a bandoná e sitio lagando e outo atras. E outo bandoná ku no tabata di start pero tabata pará nèt riba un seritu, a kore baha for di e seritu bai pega den un kurá di kas riba e krusada Mayaguanaweg/Bahamasweg.

Kontinuando ku e investigashon den área di Buena Vista, personal di Tim di Mantenshon di Òrdu Públiko a detené un di e sospechosonan e hòmber R.Th. di 18 aña di edat nasé na Sto. Domingu.

A presentá e sospechoso dilanti di un fiskal ouksiliar, ku a ordená su enkarselamentu. Tim di Atrako ta kontinuá ku e investigashon.

###

Detenshon pa maltrato.

WILLEMSTAD, Curacao — Djarason 24 di yüni 2015, alrededor di 05.’or di mainta, Sentral di Polis a dirigí un patruya na un kas den Rubiweg pa un kaso di maltrato.

Na yegada di polis na e sitio, nan a topa ku un hòmber F.Th. ku a deklará ku e tabatin un diskushon ku su ruman hòmber ku a sali for di man i el a dal e ku un pòmp di baiskel.

Ambulans a transportá e víktima pa poliklínika di SEHOS pa tratamentu médiko. Polis a detené e hòmber sospechoso F.F.Th. di 56 aña di edat, nasé na Kòrsou relashoná ku maltrato.

Despues di a presentá e sospechoso dilanti di un fiskal ouksiliar, el a keda enkarselá pendiente di mas investigashon.

###

kòntròl di tráfiko.

WILLEMSTAD, Curacao — Djamars 23 di yüni 2015 personal di Tim di Mantenshon di Òrdu Públiko a tene kòntròl di tráfiko entre 18.30 te ku 19.45’or riba Hoogstraat.

Na e sitio menshoná a kontrolá un total di 38 vehíkulo i a parti 25 prosèsverbal pa diferente infrakshon kometé:

  • Kore outo sin karchi di kùr 2
  • Kore outo sin reibeweis 5
  • Kore outo sin seguro 4
  • Kore outo sin number pagá 1
  • Kore outo sin faha di seguridat 9
  • Otro infrakshon 4
  • Dos (2) vehíkulo a bai kurá.

A detené un(1) sospechoso maskulino A.P. nasé na Sto. Domingu di 35 aña, en konekshon ku violashon di e Lei di Opio.

Polis a konfiská un saku di plèstik ku ta kontené un kantidat di kokaina i un saku di plèstik ku ta kontené hash. Polis ta kontinuá ku mas kontròlnan di tráfiko.