KOMUNIKADO DI POLIS 15 Mei: Detenshon di 4 sospechoso

705
KUERPO POLISIAL KÒRSOU

Police Curacao logoWILLEMSTAD, Curacao — Djabièrnè 15 di mei 2015, alrededor di 14:10’or, Sentral di Polis a dirigí un unidat di warda di Otrobanda na un sitio den área di Piscadera pa un outo kolo krèm ku ta kore den un forma sospechoso. Na yegada di e patruya na e sitio nan no a bin topa ku e outo. Kontinuando ku e patruya den bisindario e agentenan a bin señalá e outo ku e kuater sospechosonan. Na e momento ei a start un persiguishon tras di e outo i polis a duna e shofùr òrdu pa para e vehíkulo.

E shofùr no a duna oido na esaki i a hisa su velosidat i sigui kore. Durante di e persiguishon den diferente kayanan, riba e krusada Bahamasweg/Blanquillaweg un di e okupantenan ku tabata sintá patras den e outo a mek ku un arma riba e agentenan. Na e momentu ei polis a los un tiru dirigí riba e vehíkulo. E outo a sigui kore drenta Julian i e patruya a bin pèrdè for di bista. E patruya a keda reforsá ku mas unidatnan di diferente warda. Riba Schottegatweg a bolbe señalá e outo aki ku e kuater(4) sospechosonan banda di e outo kambiando nan pañanan.

Akinan polis a logra detené un di e sospechoso nan. E tres(3) otro sospechosonan a kore na pia bai for di e sitio drenta Puertoricoweg. Aki polis a los un tiru di atvertensia i a sigui nan tras na pia i a logra detené un di dos(2) sospechoso den área di un snèk. Durante di un búskeda den bisindario a bin haña un arma di kandela ku e sospechoso a tira den un kliko. E búskeda a sigui den mesun área i polis a bin logra detené e otro dos sospechosonan tambe.

Nan tabata skonde den dos(2) diferente kurá di kas. Mas despues na un adrès den Puertoricoweg, polis a haña un arma mas skonde den e kurá di e kas.

Polis a konfiská tur e artíkulonan e.o. un shotgun; un pistol ; un outo i diferente paña.

E sospechosonan ku a keda detené ta trata di:

S.J.M.G.C., nasé na Kòrsou, di 18 aña di edat;

R.E.E.Th., nasé na Hulanda, di 20 aña di edat;

 J.D.LL., nasé na Kòrsou, di 18 aña di edat

 C.C.C., nasé na Kòrsou, di 23 aña di edat.

A presentá tur kuater sospechoso dilanti di un fiskal ouksiliar ku a ordená nan enkarselamentu, pendiente di mas investigashon.

Polis ta gradisí tur habitante di Buena Vista i Julian ku a koperá ku polis. Huntu nos ta logra.