Arma di kandela konfiská.
WILLEMSTAD, Curacao — Djasabra 23 di mei 2015, alrededor 10.45’or di mainta, e unidat polisial UST a hasi un entrada hudisial na un kas na Sabana Hundu en konekshon ku violashon di Lei di arma i Lei di droga. Na momentu ku e unidat a yega na e adrès no tabatin ningun persona na kas.
A start ku un investigashon den e kas i a bin haña un arma di kandela di kaliber 22. A konfiská esaki i e investigashon den e kaso aki ta kontinuá.
###
Detenshon
WILLEMSTAD, Curacao — Djadumingu 24 di mei 2015, alrededor di 05.40’or unidat polisial UST a hasi un entrada hudisial den un kas na Portugezenweg en konekshon ku violashon di Lei di droga. Durante di e investigashon a konfiská un balansa, un kantidat di saku chikí di mariwana i di kokaina.
Relashoná ku esaki a detené na e sitio e hòmber sospechoso R.C.F.d.C., nasé na Kòrsou, di 39 aña di edat. A presentá e sospechoso dilanti di un fiskal ouksiliar ku a ordená su enkarselamentu pa mas investigashon.
###
Kontròl di tráfiko.
WILLEMSTAD, Curacao — Djaluna 25 di mei 2015 entre 5’or pa 8‘or di mainta personal di e Warda di Polis Barber, a tene kòntròl di tráfiko na altura di Malpais. Nan a kontrolá un total di 96 vehíkulo i a parti un total di 25 prosèsverbal pa diferente infrakshon kometé.
- Kore outo sin faha di seguridat bistí 06
- Kore outo sin reibeweis 06
- Outo sin seguro bálido 04
- Kore outo sin plachi number 04
- Kore outo sin number pagá 02
- Otro infrakshon 03
###
Intento di atrako riba un negoshi na Renaissance.
WILLEMSTAD, Curacao — Djaluna 25 di mei 2015, alrededor di 11.50’or di mainta, Sentral di Polis a risibí notifikashon di un intento di atrako ku a tuma lugá na un negoshi na Renaissance. Mesora a dirigí un unidat na e sitio.
For di un investigashon ku polis a realisá a resultá ku un hòmber deskonosí tur na pretu bistí, ku muts riba su kabes i arma di kandela den man a baha ku un kabuya nèt dilanti di e entrada di e negoshi.
Ku un mukel e tipo aki a bati riba porta di e negoshi sin e resultado deseá. E hòmber sospechoso a wòrdu deskubrí dor di un bewaker ku a los tiru dirigí riba dje, kaminda el a hañ’é obligá ta hui for di e sitio den un vehíkulo direkshon di Rouvilleweg. Polis a start un búskeda i ku yudansa di komunidat alrededor di 13.00’or polis a bin en kontrá e hòmber sospechoso i e vehíkulo den Saliña.
A detené e hòmber A.M.B.Y nasé na Colombia di 32 aña di edat komo sospechoso di intento di atrako i a konfiská e vehíkulo i artíkulonan di importansia pe investigashon. A presentá e sospechoso dilanti di un fiskal ouksiliar, ku a ordená su enkarselamentu. Tim di Atrako ta kontinuá ku e investigashon.
###
Ladronisia ku 3 detenshon
WILLEMSTAD, Curacao — Djaluna 25 di mei 2015, alrededor di 13.30.’or polis di Barber a risibí notifikashon ku tres hòmber ta kanando riba e “vlakte” na Tera Kòrá na altura di e “molinanan di bientu” ku kabritunan mara ku kabuya riba nan lomba.
Un patruya di polis a dirigí nan mes rápidamente na e sitio ariba menshoná i na altura di e “Trapi” kaminda e molinanan di bientu ta situá polis a bin en kontrá ku e tres hòmber nan.
Na momentu ku e trio a ripara ku nan a kedá deskubrí nan a trata di los e kabritu nan. Un di e sospechosonan a trata di hui bai den direkshon di mondi pero polis a lográ di detené tur tres komo sospechoso di ladronisia di kabritu.
Ta trata di e hòmbernan: J.C.V nase na Kòrsou di 21 aña di edat S.S.M nase na Kòrsou di 20 aña di edat J.E.F.S nase na Kòrsou di 17 aña di edat A presentá tur tres (3) sospechoso dilanti di un fiskal ouksiliar ku a ordená nan enkarselamentu pa mas investigashon.
