Atrako den Plantageweg.
Djarason 8 di aprel 2015, alrededor di 16.00’or Sentral di Polis a dirigí un patruya na un kas na Plantageweg den Julianadorp pa un kaso di atrako ku a kaba di tuma lugá. For di un investigashon ku polis a realisá na e sitio a resultá ku e víktima, un hòmber komersiante di 80 aña di edat, a yega su kas den su outo i na momentu ku el a bai habri su porta di kurá el a keda sorprendé pa un hòmber ku a dal e vários bes den su kara i kita un suma di plaka konsiderabel for di dje. Despues di su akto e sospechoso a drenta un outo ku tabata pará ta ward’é i nan a bandoná e sitio. E víktima tabatin algun leshon i a keda di bai su dòkter di kas. E investigashon ta kontinuá.
####
Programa di prevenshon pa hobennan.
Djawebs 9 di aprel 2015, Alto-Inspektor di polis sr. Albert Schoop lo bai duna entrenamentu na 80 hóben di entre 4 pa 14 aña di edat. Ta trata aki di hóbennan ku a keda selektá for di un grupo di hóben ku problemanan di komportashon, difikultat den edukashon i desaroyo soshalemoshonal. Meta di e entrenamentu aki ta pa inspirá e hóbennan aki ku un kambio di komportashon positivo pa medio di formanan di trabou intensivo i integrá den aire liber. Lider di e proyekto aki, kende ta sr. Norwin Martina ke logra na prevení kriminalidat bou di hubentut, basando e meta riba Rèspèt, Amor i Konosementu (RAK). I en bista ku Kuerpo Polisial tambe ta konsiente ku dor di prevení nos por evitá hopi lamento, mesora a pone un di su entrenadónan na disposishon pa asina kontribuí na e kousa noble aki.
####
Charla di Prevenshon i polis den bario di Barber
Plataforma Banda Bou huntu ku Warda di polis Barber konhuntamente ta trahando riba un proyekto di Prevenshon di Kriminalidat den bario di Banda Bou. Despues di nos promé enkuentro ku a tuma lugá na Sentro di Bario Westpunt nos ta kontinuá ku nos charla pa e bario di Barber i besindario. Plataforma Banda Bou huntu ku Polis di Barber kier invitá komunidat i organisashonnan di Banda Bou na un anochi informativo. E anochi informativo ta tuma lugá: Dia: Djaweps 09 di aprel 2015; Lugá: Brantwer Barber ; Ora: 19.00 – 21.00 ‘or.
####
Akshon “Ban Duna Bèk”.
Kuerpo Polisial Kòrsou, konsiente di situashonnan hopi bia penoso i di miseria ku ta reina den hopi kasnan di famia aki na Kòrsou, a bini ku un inisiativa noble pa e temporada di kuaresma ku a pasa. For di e promé siman di kuaresma, Departamentu di Komunikashon i Prevenshon di polis a tene un kolekta di komestibel na tur warda i ofisina di polis. Ta trata aki di un akshon ku a hiba e nòmber “Ban Duna Bèk”. Ku esaki Kuerpo polisial kier a mustra su gratitut na promé lugá na e Ser Supremo pa tur e grasianan ku tur dia su miembronan ta risibí, manera protekshon, bendishon, fortalesa i sabiduria. Na di dos lugá nos kier a mustra tambe ku tin hopi kos bon ta pasa den e kuerpo i ku su kurason ta bati huntu ku esun di e komunidat. Trahadónan den kuerpo polisial tur dia ta mira hopi situashon di pobresa i lamentablemente no por hasi kasi nada. P’esei ku e kolekta di komestibel aki den nos organisashon, ku kual a logra sera mas ku 42 pakete, nos ta spera di a hasi un kantidat di famia kontentu den e dianan di fiesta ku a pasa. I di e forma ei duna bèk na komunidat di kua nos ta orguyoso di ta forma parti di dje.
