Polis a arestá kasá di e señora Cristina Barry ku polis a haña morto den su kurá di kas.

1443

Willemstad – Polis a arestá kasá di e señora Cristina Barry ku polis a haña morto den su kurá di kas. Investigashon ta indiká ku di un manera òf otro e kasá tin algu di aber ku e asesinato. Ta trata di un hòmber ulandes ku ta duna lès na un skol avansá priva aki na Kòrsou.  E aresto a bin despues ku un dia promé polisnan a realisá entrada hudisial i a kue vários kos den beslag pa investigashon.

For di e promé momentu ku polisnan a yega na e sitio di e krímen dia di e asesinato, polisnan por a nota ku no ta trata aki di un atrako ku a kaba den un morto. E senario tabata duna bon kla ku algu otro a tuma lugá i for di e momentu ei tabatin interogatorio nan kiko lo por a pasa.

E investigashon a pone ku e kasá na e momentunan aki ta sospechoso prinsipal, pero tin hopi rumor mas ta sirkulá, pero e investigashon lo mester determiná kiko realmente a sosodé riba e dia fatal pa Sra. Cristina Elisabeth Barry (35). 

Tabata djadumingu 15 di mart 2015, alrededor di 23.35’or Sentral di Polis a dirigí un unidat polisial na un kas den Kaya Misa Alegre na Zuid Bonam despues di haña informashon ku un dama a keda asesiná.

Na yegada di e unidat nan a bin en kontrá ku un hende muhé drumí den kurá patras di e kas ku vários hinká na su kurpa i no tabata duna señal di bida.

Tabatin diferente tas di e víktima bentá den kurá for di kual polis por a konkluí ku violensia a wòrdu uzá riba e dama aki na momentu ku el a yega kas den su outo

Riba òrdu di fiskal di Ministerio Públiko a konfiská e kurpa sin bida pa mas investigashon.