Hustisia: Kaso nan den Korte !

1147

Cicely van der Dijs ku kaso kontra dagvaarding

Willemstad – Djabièrnè awor e “regiezitting” den kaso di Cicely van der Dijs no ta sigui debi ku el a kuminsá ku un kaso di opheshon kontra di e dagvaarding ku Ministerio Públiko a saka den su kontra. Pero e “regiezitting” kontra di su partner, lider di partido MFK, Gerrit Schotte si ta kontinuá djabièrnè awor. E kaso di e pareha a haña e nòmber Babel. Nan ta keda akusá di falsifikashon, labamentu di plaka. Pa Schotte tin denunsia falsu di pèrdida di pasport diplomátiko, “omkoping”, i tabatin den su poder “jammers” un aparato telekomunikashon.

###

Hòmber no tabatin eksplosivo pero vürwèrk peligroso

Willemstad – Despues ku wes Hubben a tende for di boka di eksperto di vürwèrk ku e akusado Shurendi Sambo no tabatin dinamit, pero vürwèrk peligroso, wes a apsolbé e akusado di poseshon di dinamit manera Ministerio Públiko a akus’é di dje. E ta keda akusá ku dia 15 òktober 2014 e tabatin dinamit, un arma di ko’i hunga di “airsoft” i a entrega e dinamitnan pa bula un kas den Kaya Yeye.

E Eksperto Gustavo Semeleer a bisa wes ku e loke a keda konfiská ta vürwèrk ku nan a drecha i tabatin demasiado pòlvo aden. E no ta sirbi pa bula un kas. Esei a pone ku wes no a sigui demanda di fiskal Bos di 4 aña kontra di Sambo. Su defensor mr. Marije Vaders a pidi korte pa apsolv’é su kliente di tur kulpa di poseshon dje dinamitnan ya ku a resultá ta vürwèrk peligroso i pa kual no tin kastigu. Wes a kondena Sambo solamente pa poseshon dje arma “airsoft” 4luna kondishonal.

Fuente Hustisia.com