Detenshonnan pa manehá bou di influensia di alkohòl
Den e dianan ku a pasa, polis a detené tres(3) shofùr pa manehá bou di influensia di alkohòl.
Djárason 13 di mei, alrededor di 5 or di mardugá, a detené un dama di inisial B.E.P.M.M. di 19 aña di edat na Kaya L.D. Gerharts. Un patruya a mira e sospechoso riba un skuter i a konstatá komportashon peligroso di manehá. Pa e motibu aki a par’é pa kòntròl. Durante e kòntròl, a hasi un tèst di supla ku e sospechoso i a resultá ku el a konsumí mas alkohòl ku ta pèrmití pa lei. E sospechoso a haña prohibishon pa manehá di 2 ora.
Djárason 13 di mei, alrededor di 1.50 or di mardugá, a detené un hòmber di inisial L.M.C. di 19 aña di edat riba Kaya Korona. Un patruya a mira e sospechoso ta kore zeilu ku su pikòp i a par’é pa un kòntròl. Durante e kòntròl, a hasi un tèst di supla kuné i a resultá ku el a konsumí mas alkohòl ku ta pèrmití pa lei. E sospechoso a haña prohibishon pa manehá di 5 ora.
Djamars 12 di mei, alrededor di 7.15 or di anochi, a detené un hòmber di inisial E.F.M. di 55 aña di edat riba Kaya L.D. Gerharts. E sospechoso a bèk ku su outo i dal dos persona riba un skuter stashoná. Un di e personanan riba e skuter a resultá heridá i a pidi asistensia di ambulans. Konforme e maneho di ‘botsen is blazen’, a hasi un tèst di supla ku e sospechoso i a resultá ku el a konsumí mas alkohòl ku ta pèrmití pa lei. E sospechoso a haña prohibishon pa manehá di 5 ora.
A transportá tur sospechoso pa warda di polis pa kontinuá ku e trámitenan korespondiente. Aki nan lo haña un prosèsferbal tambe.
Ladronisia di betònmolen
Djamars 12 di mei a drenta keho di ladronisia na un sitio di konstrukshon na Bulevar Julio A. Abraham. Deskonosínan a haña akseso na e tereno di Entidat Publiko Boneiru i a bai ku un betònmolen. Ta investigando e kaso.
Ladronisia di skuter
Djamars 12 di mei a drenta keho di ladronisia di un skuter koló pretu di e marka Sym, modèl Fiddle 2, ku plachi di number MF-4160. E skuter tabata stashoná dilanti un kas na Kaya Sirena. Ta investigando e kaso.
Ladronisia for di kuartu
Djamars 12 di mei a drenta keho di ladronisia for di un kuartu(berghok) den kurá di un kas na Kaya Linda. Deskonosínan a haña akseso na e kuartu i a bai ku un maleta ku dokumentunan, karchinan i un radio di e marka GC. Ta investigando e kaso.
Detenshon pa menasa ku arma
Djaluna 11 di mei, alrededor di 11.20 or di anochi, a detené un mucha hòmber di inisial J.Q.P. di 15 aña di edat na Kaya Den Haag pa menasa ku arma(blanku) i violashon di Lei di Arma BES. E detenshon a tuma lugá despues ku e sospechoso a menasá dosentenan na un instituto situá na Bulevar Gobernador N. Debrot. Investigashon den e kaso ta kontinuá.
Detenshon pa intento di maltrato ku un arma
Djaluna 11 di mei, alrededor di 9.10 or di anochi, a detené un dama di inisial A.R.A.S. di 51 aña di edat na Kaya Gemini pa intento di maltrato ku un arma i pa insulto di un ámtenar den funshon. Ta investigando e kaso.
