Willemstad – Djaluna dia 9 di yüni último e mandato di Gabinete Pisas II a terminá ora ku Su Ekselensia Gobernador Lucille George-Wout a huramentá e ministernan i e Minister Plenipotensiario di Gabinete Pisas III. Esaki a sosodé durante un seremonia ofisial na palasio di Gobernador den Fort Amsterdam. Despues di instalashon, e miembronan di Gabinete Pisas III a regresá sala di Konseho di Minister pa nan promé reunion despues di instalashon.
For di e momento ei, Gabinete Pisas III ta den funshon bou di liderazgo di Promé Minister Gilmar Pisas, ku alabes ta Minister di Asuntunan General. Minister Pisas tin responsabilidat pa relashonnan ku eksterior, asuntunan di Reino i tambe pa medio ambiente i naturalesa. E sektor di energia (2Bays, Aqualectra i Curoil) tambe ta kai bou di Minister Pisas.
E gabinete nobo ta konsistí di e siguiente ministernan:
Sr. Javier Silvania (Minister di Finansa i Salubridat Públiko)
Sr. Charles Cooper (Minister di Tráfiko, Transporte i Planifikashon Urbano)
Sr. Sithree van Heydoorn (Minister di Enseñansa, Siensia, Kultura i Deporte)
Sr. Shalten Hato (Minister di Hustisia)
Sra. Charetti America-Francisca (Minister di Desaroyo Sosial, Labor i Bienestar)
Sr. Roderick Middelhof (Minister di Desaroyo Ekonómiko)
Sra Kimberly Lew-Jen-Tai (Minister di Gobernashon, Planifikashon i Servisio Públiko)
Sr. Carlson Manuel (Minister Plenipotensiario na Den Haag).
Gabinete Pisas III ta konsistí di un tim balansá di minister, tur di partido MFK, ku por konta ku sosten di diestres parlamentario den parlamento. Sinku di e ministernan i e Minister Plenipotensiario tin eksperensia den Gabinete Pisas II i un minister tabata te ku resien, presidente di parlamento. E dos otro ministernan ta yòn, bon prepará, dinámiko i kla pa sirbi nos pais.
Gabinete Pisas III ta balorá inmensamente e konfiansa ku pueblo a pone den partido, pa karga responsabilidat den gobernashon di nos pais. Pa esei e gobièrnu nobo ta komprometé su mes pa traha riba un desaroyo sostenibel pa Kòrsou segun e Programa di Gobernashon pa e periodo di 2025 -2029 “Rumbo pa 2030! Un kompromiso nobo ku Pais Kòrsou”.
E prioridatnan pa e periodo di gobernashon ta entre otro pa redusí e problema di e kantidat grandi di hende di edat avansá i su efektonan riba nos ekonomia, fondonan sosial, sistema di kuido i finansa públiko, Gabinete Pisas III lo enfoká riba un maneho pa hasi Kòrsou mas atraktivo pa hóben i adulto hóben sea keda establesé na Kòrsou òf regresá Kòrsou despues di nan estudio den eksterior.
Tambe Gabinete Pisas III lo duna prioridat na kombatimentu di pobresa, diversifikashon di nos ekonomia i tambe na alsa kalidat i sostenibilidat di nos sektor di kuido. Por último e gabinete nobo lo traha riba un proseso integral di rekonstrukshon di nos nashon (Nation Building) ku envolvimentu di tur e ministerionan relevante, pa drecha kalidat di bida i seguridat den nos barionan i kasnan di famia.
Tur e akshonnan aki mester kontribuí na un desaroyo sosio ekonómiko positivo i duradero pa Kòrsou riba kaminda pa 2030, ku mas bienestar i hustisia sosial pa pueblo di Kòrsou.
