Ricardi Muñoz (17) a haña rekonosementu pa su prestashonnan den bokseo

122
Susannah Panneflek (Managing Director MCB), William Evertsz en Ricardi Muñoz.

 

Kralendijk – Boxing Bonaire Federation (BBF) ta sumamente orguyoso di nos atleta Ricardi Muñoz, ku resientemente Maduro & Curiel’s Bank (MCB) a pone den spòtlait. Durante un enkuentro spesial Ricardi, kende tin 17 aña, huntu ku e otro kampionnan ku durante aña 2024 a sa di distinguí nan mes riba nivel internashonal ku nan prestashonnan, a haña rekononosementu pa su prestashonnan komo bòksdó.

Komo muestra di apresio Ricardi i su coach William Evertsz, banda di hopi felisitashon i palabra di enkurashamentu, a risibí bòn di regalo pa un sena i un ‘rugtas’. BBF ta apresiá e inisiativa di MCB enormemente: “E rekonosementu akí di Ricardi i otro deportistanan ta un tremendo motivashon pa nan, pa sigui aspirá nan ophetivonan. E no ta solamente un inspirashon pa nos atleta, pero pa otro hóbennan na Boneiru tambe pa sigui nan soñonan deportivo. Nos ta orguyoso di Ricardi i ansioso pa mira su futuro éksitonan!”

Talento prometedor
No opstante su edat hóben, ya kaba Ricardi a akumulá eksperensia impreshonante. Entre tantu e tin kuater kompetensia di bokseo tras di lomba, i e ta konosí pa su perseveransia i espíritu di lucha den rin. Ku kada pelea su talento ta krese, i ta mir’é komo un talento prometedor pa futuro di bokseo boneriano. BBF ta hunga un ròl krusial ora ta trata di hasi e tipo di prestashonnan akí posibel. E federashon ta brinda bòksdónan lokal un plataforma pa partisipashon na kompetensianan (inter)nashonal, sosten finansiero i guia profeshonal. Komo federashon BBF ta invertí den desaroyo di nos bòskdónan i ta yuda nan pa alkansá un nivel mas haltu di kompetensia, loke ta esensial pa kresementu di e deporte i e oportunidatnan pa atletanan na Boneiru.