KOMUNIKADO DI KUERPO POLISIAL KÒRSOU: 1 sèptèmber 2015

1222

Detenshon pa atrako.

Kontinuando ku investigashon relashoná ku un kaso di atrako, polis a detené un hòmber sospechoso.

Djadumingu 16 di ougùstùs 2015 den oranan di mainta dos hòmber bou di menasa ku arma di kandela, a kita un vehíkulo for di un pareha na e playa di Daaibooi.

Polis a señalá e vehíkulo i a kuminsá ku un persiguishon. Na altura di Zona Franca na Hato, un di e sospechosonan ku tabata fungi komo shofùr a pèrdè kontròl i bòltu ku e vehíkulo.

Polis a logra detené e hòmber R.A.D. di 16 aña di edat. E otro sospechoso a logra hui na pia. Djamars 1 di sèptèmber 2015 alrededor di 11’or polis a detené e otro hòmber sospechoso S.G.P. nasé na Kòrsou di 18 aña di edat, riba kaya na Roi Santu.

A present’é dilanti un fiskal ouksiliar ku a ordená su enkarselamentu pendiente di mas investigashon.

###

Detenshon pa falsifikashon di dokumentu.

Djaluna 31 di ougùstùs 2015 alrededor di 22.14’or, Sentral di Polis a dirigí un unidat polisial na aeropuerto Hato pa un dama ku Mareshosé a detené.

For di un investigashon ku polis a hasi a resultá ku e dama F.D.O.M. a biaha ku un pasport falsifiká i tambe un pèrmit di estadia di Spaña falsifiká.

Polis a detené e dama F.D.O.M. nasé na Repúblika Dominikana di 33 aña di edat. A present’é dilanti un fiskal ouksiliar ku a ordená su enkarselamentu pendiente di su deportashon.

###

Detenshon pa maltrato relashonal.

Djaluna 31 di ougùstùs 2015 alrededor di 21.49’or, Sentral di Polis a dirigí un unidat polisial na un kas na Kaya Ma Pieternella pa un kaso di maltrato relashonal i destrukshon.

Durante di un diskushon entre pareha e hòmber F.C. a maltratá su pareha H.M. ku un hèmber na su kabes. E dama ku a sufri un kap na su frenta a propiná e hòmber hinká na e parti patras di su garganta i sali kore bai na bisiña.

F.C. a bai tras di su pareha i na kas di e bisiña e la tira piedra i kibra un porta di glas.

Ambulans a transportá e víktima F.C. pa poliklínika di SEHOS pa tratamentu médiko. Despues di intervenshon médiko e hòmber F.C. nasé na Kòrsou di 50 aña di edat, a keda detené pa maltrato i a keda interná den St. Elisabeth Hospital.

E dama H.A.M. nasé na Kòrsou di 42 aña di edat, despues di tratamentu médiko na poliklínika di SEHOS a keda detené relashoná ku maltrato. Investigashon den e kaso aki ta kontinuá.

###

kontròl ku vários detenshon

Djaluna 31 di ougùstùs 2015, den oranan di mainta personal di “Unit Speciale Taken” a tene un entrada hudisial na un kas na Guadeloupeweg relashoná ku violashon di e Lei di Atmishon i Ekspulshon.

Durante di e kontròl, polis a detené un hende hòmber di nashonalidat guyanes i un hende muhé ku su yu hòmber di nashonalidat hamaikino. A transportá tur e personanan ariba menshoná pa Departamentu di Imigrashon pa mas investigashon.

Despues di investigashon e dama i su yu di nashonalidat hamaikino a keda den libertat, despues ku nan dokumentunan tabata na òrdu. Siguiendo ku e kontròlnan e tim a nota un outo di famia koriendo ku yen di hòmber aden. E agentenan a para e outo i a tene un kontròl.

Den e outo tabatin sinku(5) hende hòmber i den e baul tambe tabatin un otro hende hòmber mas. Tur e hòmbernan aki ta di nashonalidat venezolano. Nan no por a mustra nan dokumentonan nesesario pa por permanesé riba nos isla.

Nan a keda detené i hiba departamentu di imigrashon pa mas investigashon. Alrededor di 10.15’or e tim huntu ku SOAB i S.V.B. a sigui ku e kontròl aki na un establesimentu den Veerisweg.

Durante di e kontròl aki a resultá ku diestres (13) venezolano ku ta laborá na e establesimentu no por a mustra nan dokumentonan nesesario pa por permanesé riba nos isla. Tur diestres(13) persona a keda detené i hiba departamentu di imigrashon pa mas investigashon.

Despues di investigashon ocho(8) di nan a keda será pendiente nan deportashon. Sinku(5) di nan por a bai kas despues ku nan dokumentunan tabata na òrdu. Investigashon den e kaso ta kontinuá.