KOMUNIKADO DI KUERPO POLISIAL KÒRSOU 10 aprel 2015

1154

Police Curacao logoKòntròlnan general i preventivo

Djaweps 9 di aprel 2015, personal di e warda di Rio Canario (THT), a tene kòntròlnan general i preventivo en konekshon ku violashon di e leinan di Opio, Arma, ladronisia i kiebro.

E kòntròlnan aki a tuma lugá: Entre 21.50’or pa 22.40’or riba Schottegatweg Nòrt a kontrolá un total di 22 vehíkulo i a parti dos but pa entre otro kore outo sin reibewijs i sin dokumentu di seguro, tambe a konfiská un kantidat hopi chikitu di hash den un saku di plèstik.

Alrededor di 22.50’or e unidat a sigui ku e kontròl riba Van Krimpenlaan, aki nan a kontrolá 11 persona i a konfiská:

 un kantidat hopi chikitu di mariwana;

 un saku hopi chikitu di kokaina i

 un saku di plèstik ku 8 sigaria di mariwana ku tabata abou na suela.

Alrededor di 23.20’or kontròl a sigui den bario di Seru Fortuna, durante di e kontròl a kontrolá 6 persona, pero no a haña nada partikular.

E kontròlnan aki ta kontinuá.

####

Dos detenshon.

Djabièrnè 10 di aprel 2015, alrededor di 04.15’or di mardugá, Sentral di Polis a dirigí un unidat polisial na un kas na kaya tèrt pa un kaso di ladronisia di un outo blanku.

Mesora e unidat polisial a dirigí nan mes na Pos Salu kaminda ta konosí ku nan ta pluma outonan hòrtá. Koriendo riba e kaminda Weg Groot st. Joris i yegando na e krusada na altura di e plantashon di álue, e unidat a konstatá un outo blou ta sali for di e kaminda di tera ku ta guia na Pos Salu.

Na momento ku e shofùr di e outo aki a mira e outo di polis el a kore ku un velosidat haltu pa bandoná e sitio. Mesora e unidat a start ku un persiguishon i a duna e shofùr señal pa para. E shofùr a neglishá esaki i sigui kore.

E agentenan a haña nan obligá ta usa nan arma reglamentario pa logra para e outo. Riba e kaminda George Maduroweg/ Kas Kòráweg nan a logra para e outo i detené e dos okupantenan.

Ta trata di: e shofùr A.T.H. di 29 aña, ku a haña un herida di bala na altura di su orea drechi i e okupante C.J.J.F. di 22 aña, ku tambe a haña un herida di bala den su lomba. Ámbos sospechoso ta nasé na Kòrsou.

Nan a keda transportá pa Poliklínika di SEHOS pa tratamentu médiko, despues di tratamentu nan keda interná i presentá dilanti un Fiskal Ouksiliar ku a ordená nan enkarselamentu. Den e outo ku e sospechonan tabata kore polis a haña algun parti di piesa di e outo blanku i a konfiská esakinan pa mas investigashon.

E investigashon ta kontinuá.

####

Kòntròlnan general i preventivo.

Djaweps 10 di aprel 2015, personal di e warda di Punda (THT), a tene kòntròlnan general i preventivo en konekshon ku violashon di e leinan di Opio, Arma, ladronisia ku violensia, ladronisia di outo i kiebro.

E kòntròlnan aki a tuma lugá den e áreanan di Saliña i bisindario, Bapor Kibra i bisindario i Pietermaai i bisindario. Durante di e kòntròlnan menshoná a kontrolá 11 persona i 6 vehíkulo, miéntras sinku di e shofùrnan aki a haña un but pa dokumentonan di e vehíkulonan ku no tabata na òrdu.

Na Waaigatplein kaminda 3 hòmber a keda kontrolá a haña un sigaria di mariwana den nan bisindario i a konfiská esaki. I nan a keda atendé riba nan kondukta. E kontròlnan aki ta kontinuá.