KPC i OM a intensivá koperashon riba tereno di VVC

0
580

WILLEMSTAD – Funshonarionan polisial di e team di “Veel Voorkomende Criminaliteit” (VVC) di Kuerpo di Polis (KPC) a topa djarason 13 di mei 2015 ku funshonarionan di Ministerio Públiko (OM) Kòrsou. Meta prinsipal pa e enkuentro tabata pa miembronan di VVC i OM konosé otro mas mihó na benefisio di e kousa komun, esta mas éksito den Korte ku kasonan ku keda presentá.

E dia a start mainta den sentro di bario Montaña na unda hefe di e team di VVC, sr. Maurits Rosalina, na nòmber di KPC a duna un splikashon ekstenso di funshonamentu di e team ku ta atendé ku kriminalidat frekuente manera entre otro ladronisia den kas, negoshi i outo, maltrato, malversashon, kiebro i destrukshon. Kehonan ku mas ta asotá nos isla i ta representá e parti mas grandi di tur keho ku ta ser investigá. Tambe sr. Rosalina a splika di e forma nobo di tuma keho na wardanan di polis pa medio di funshonarionan nobo ku ta atendé ku e promé keho di suidadanonan na warda di polis.

Job van Beekhoven, hefe suplente di Ministerio Públiko, a splika na su turno esnan presente kon OM ta atendé ku prosèsverbalnan ku ta drenta OM i kon ta prosesá esakinan pa nan yega Korte. Tambe Van Beekhoven a splika ku OM lo ta entrante 1 di mei 2015 mas visibel na wardanan di polis na unda hurista (Parketsecretaris) di OM i Fiskal di OM ta bai reuní mas frekuente na warda di polis pa asina sostené i guia e proseso di prosesá prosèsferbal. Tur esaki ku e meta pa logra mas éksito den Korte ku kasonan ku keda presentá.

E proyekto nobo aki lo bai baha e kasonan ku OM ta seponeer miéntras ku lo pèrkurá pa mas kaso keda atendé pa medio di asina yama HuRa-zitting (Hustisia Rápido).
Tur esnan ku a partisipá na e enkuentro a bishita e wardanan di polis di Montaña (wijkteam Oost), warda di polis Rio Canario (wijkteam Centrum) i Warda di polis Barber (wijkteam West). Na tur warda di polis por a mira entre otro kon e proseso di trabou I e proseso di tuma keho ta tuma lugá.

E dia a klousurá ku palabranan di Jules Ilario na nòmber mando di KPC i Heiko de Jong di parti di OM. Ámbos a mustra nan apresio pa e aserkamentu nobo i a aploudí e inisiativa ku a ser lansá. Ámbos a mustra tambe ku e enkuentro di djarason lo por bai benefisiá KPC i OM, benefisiá mihó kaso ku lo keda presentá i finalmente benefisiá komunidat di Kòrsou.