KOMUNIKADO DI KUERPO POLISIAL KÒRSOU 23 sèptèmber 2015.

0
1756

Detenshon pa ladronisia.

DSC_0394-001WILLEMSTAD, Curacao — Djarason 23 di sèptèmber alrededor di 04.40’or, Sentral di Polis a risibí notifikashon ku riba Sta. Rosaweg na altura di un negoshi tin dos hòmber tur na pretu bisti ku kara tapa.

E patruya ku a yega na sitio a nota ku e porta di glas di e negoshi ta kibrá i ku tin paña benta abou den e negoshi.

For di un investigashon ku polis a realisá na e sitio a resultá ku deskonosínan a kibra drenta den e negoshi i kue merkansia hinka den un outo di famia i bai for di e sitio den e outo i tambe un pikòp.

Kontinuando ku investigashon den e área, polis a señalá na altura di un kas riba Seru Loraweg e outo di famia i tambe e pikòp.

Polis huntu ku un fiskal ouksiliar a hasi un entrada hudisial den e kas riba Seru Loraweg.

DSC_0396-001Den e kas polis a haña i konfiská un kantidat grandi di paña nobo i tambe hopi prenda di “stainless steel”.

Tambe polis a konfiská e outo i e pikòp pa mas investigashon. A detené shete hòmber ku tabata na e kas:

  • F.D.P 23 aña di edat; S.J.R.S. 18 aña di edat;
  • S.V.N. 18 aña di edat; K.J.A. 20 aña di edat;
  • F.M.A. 23 aña di edat; N.G.S. 21 aña di edat;
  • R.R.N.M. 23 aña di edat,

Tur nasé na Kòrsou komo sospechoso di e ladronisia ariba menshoná. A presentá nan dilanti di un fiskal ouksiliar ku a ordená nan enkarselamentu pendiente di mas investigashon.

###

Detenshon pa intento di ladronisia

Curacao Police Logo 640x360WILLEMSTAD, Curacao –Djamars 22 di sèptèmber 2015 alrededor di 20.15’or, Sentral di Polis a dirigí un patruya na un establesimentu na Heintje Kool, pa un kaso di ladronisia ku ta tumando lugá. E patruya ku a yega rápidamente na e sitio a topá ku dos hòmber riba dak di e edifisio. E sospechosonan a keda detené pa intento di ladronisia.

Ta trata di:

  • E.J.M.C.K. di 28 aña di edat, nasé na Kòrsou.
  • E.Q.L. di 54 aña di edat, nasé na Kòrsou.

A presentá e duo aki dilanti di un fiskal ouksiliar ku a ordená nan enkarselamentu pendiente di mas investigashon.

###

Tres detenshon pa ladronisia.

KUERPO POLISIAL KÒRSOU
KUERPO POLISIAL KÒRSOU

Djamars 22 di sèptèmber 2015, alrededor di 19.30’or, Sentral di Polis a dirigí un patruya na un minimarket riba Carasbaaiweg, despues di a haña notifikashon ku dos dama ta hòrtando den e establesimentu.

E patruya ku a yega na e sitio a topá ku un hòmber den bisindario di e minimarket, sinta den un outo ku ta kuadra ku deskripshon ku e sospechonan tabatin. Mesora polis a detené e hòmber sospechoso H.G.E. nasé na Kòrsou di 46 aña di edat.

Siguiendo ku e investigashon awe mainta 23 di sèptèmber, polis a detené dos dama relashoná ku e kaso aki na e departamentu di reshèrshe.

  • M.S.J.M.C.A.E. di 36 aña di edat, nasé na Kòrsou
  • J.D.M.P. di 48 aña di edat, nasé na Kòrsou.

A presentá e sospechosonan dilanti di un fiskal ouksiliar ku a ordená nan enkarselamentu pendiente di mas investigashon.