Entrante di djárason promé di aprel próksimo ta kuminsá e fase final di benta di entrada pa FIFA World Cup 2026. Esaki ta e último oportunidat pa bo kumpra bo ‘ticket’ pa ta presente na momentu ku nos ekipo nashonal subi tarima mundial. No warda mas, probechá di e oportunidat, sostené nos selekshon i forma parti di e momento históriko akí.
Rònt mundu e demanda pa ‘ticket’ di Mundial ta sin presedente. For di e fecha di promé di aprel 2026 11:00 ET (17:00 CET) FIFA ta habri e fase ‘Last-Minute Sales’. Den e di kuater i último ronda di benta, ‘ticket’ ta keda ofresé via FIFA.com/tickets, riba e base ‘first come, first served’ te asina leu ku tin “ticket” disponibel. E fase akí ta dura te fin di e torneo, pero tene kuenta ku kantidat ta limitá.
Fanátikonan por mira dirèkt kua weganan ta disponibel ainda, skohe nan mes lugá via e mapa di e stadion òf hasiendo uso di e opshon “Book the best seat”. Despues di pago, bo ta risibí e konfirmashon mesora. Bo a kumpra ‘ticket’ anteriormente kaba? Esei ke men ku bo asientonan ta bisto for di 1 di aprel den bo FIFA-account (kuenta di FIFA).
FFK ta hasi un yamada na fanátikonan pa kontrolá e wèpsait di ‘ticket’ ku regularidat. Tíketnan por ta disponibel atrobe, asta riba e dia di e wega. Ademas riba 2 di aprel, ta habri e plataforma ofisial di Resale/Exchange, kaminda fanátikonan por kumpra òf bende ‘ticket’ na un manera sigur.
E interes pmundial ta históriko: mas ku 500 mion aplikashon tin i kasi 1 mion ‘ticket’ bendí kaba. Ku ménos di 80 dia pa bai ainda, Mundial 2026 ta rumbo pa un kantidat rèkòrt di bishitante.
