Algun Kasonan den Korte na Korsou

3823
Curacao courthouse

Fuente Hustisia

KPC ban duna bekKuerpo Polisial a hasi 42 famia kontentu ku un pakete di komestibel

Willemstad – Kuerpo Polisial Kòrsou, konsiente di situashonnan hopi bia penoso i di miseria ku ta reina den hopi kasnan di famia aki na Kòrsou, a bini ku un inisiativa noble pa e temporada di kuaresma ku a pasa.

For di e promé siman di kuaresma, Departamentu di Komunikashon i Prevenshon di polis a tene un kolekta di komestibel na tur warda i ofisina di polis. Ta trata aki di un akshon ku a hiba e nòmber “Ban Duna Bèk”.

Ku esaki Kuerpo polisial kier a mustra su gratitut na promé lugá na e Ser Supremo pa tur e grasianan ku tur dia su miembronan ta risibí, manera protekshon, bendishon, fortalesa i sabiduria. Na di dos lugá nos kier a mustra tambe ku tin hopi kos bon ta pasa den e kuerpo i ku su kurason ta bati huntu ku esun di e komunidat.

Trahadónan den kuerpo polisial tur dia ta mira hopi situashon di pobresa i lamentablemente no por hasi kasi nada. P’esei ku e kolekta di komestibel aki den nos organisashon, ku kual a logra sera mas ku 42 pakete, nos ta spera di a hasi un kantidat di famia kontentu den e dianan di fiesta ku a pasa. I di e forma ei duna bèk na komunidat di kua nos ta orguyoso di ta forma parti di dje.

####

80 hóben lo haña entrenamentu  pa un kambio di komportashon

Willemstad – Djaweps 9 di aprel 2015, Alto-Inspektor di polis sr. Albert Schoop lo bai duna entrenamentu na 80 hóben di entre 4 pa 14 aña di edat.

Ta trata aki di hóbennan ku a keda selektá for di un grupo di hóben ku problemanan di komportashon, difikultat den edukashon i desaroyo soshal emoshonal.

Meta di e entrenamentu aki ta pa inspirá e hóbennan aki ku un kambio di komportashon positivo pa medio di formanan di trabou intensivo i integrá den aire liber. Lider di e proyekto aki, kende ta sr. Norwin Martina ke logra na prevení kriminalidat bou di hubentut, basando e meta riba Rèspèt, Amor i Konosementu (RAK).

En bista ku Kuerpo Polisial tambe ta konsiente ku dor di prevení nos por evitá hopi lamento, mesora a pone un di su entrenadó nan na disposishon pa asina kontribuí na e kousa noble aki.

####

Komersiante (80) atraká den su kas

Willemstad – Djarason 8 di aprel 2015, alrededor di 16.00’or Sentral di Polis a dirigí un patruya na un kas na Plantageweg den Julianadorp pa un kaso di atrako ku a kaba di tuma lugá. For di un investigashon ku polis a realisá na e sitio a resultá ku e víktima, un hòmber komersiante di 80 aña di edat, a yega su kas den su outo i na momentu ku el a bai habri su porta di kurá el a keda sorprendé pa un hòmber ku a dal e vários bes den su kara i kita un suma di plaka konsiderabel for di dje. Despues di su akto e sospechoso a drenta un outo ku tabata pará ta ward’é i nan a bandoná e sitio. E víktima tabatin algun leshon i a keda di bai su dòkter di kas. E investigashon ta kontinuá.

####

Mula kurasoleño ta revelá: Den dos transporte el a traha 10.700 euro

 

Utrecht – Hustisia ulandes ta ekspropiá 10.700 euro for di un mula kurasoleño ku a gana e plaka aki den dos transporte di droga entre di Kòrsou i Ulanda.

Un mula kurasoleño di 56 aña di edat mester paga estado ulandes 10.700 euro, plaka ku el a gana ku transporte di droga.

Tabata e mula i su kasá ku tur dos ta keda akusá di trafikashon di droga i dia ku polisnan a hasi un e entrada hudisial, den nan kas i e dia ei a haña 4.539,32 euro.

E suma di plaka aki a keda poné pa kuenta di e partner. Pa loke ta trata e hòmber, el a duna di konosé ku na dos okashon el a transportá kokaina for di Kòrsou pa Ulanda.

Tabata den luna di aprel 2014 kaminda ku el a pasa kokaina for di Kòrsou pa Ulanda i e dia ei el a kobra 3.400 euro. Despues den luna di yüni el a bolbe pasa un lote di droga i e dia ei el a kobra 7.300 euro. Pues na total 10.700 euro.

Fiskal ta di opinion ku e suma di plaka ei, e mula mester paga na estado.

Pa yega na e suma ku lo keda ekspropiá, e tribunal ta wak kiko ta e gastunan ku e mula tabatin pa e gana e plaka i hopi biaha nan ta kita e gastunan i e sobrá ta plaka ku nan ta ekspropiá.

Den e kaso aki a sali na kla ku e mula no tabatin niun gastu i p’esei fiskal a pidi pa kita e suma di plaka kompleto.

Abogado di e mula den su defensa no a defendé e echo ku no mester ekspropiá, ni tampoko kon a yega na e suma di plaka ku ke ekspropiá, pero a pidi pa  pasa e suma di plaka ku a haña bou di e señora su kustodia pa e hòmber i asina paga e suma di plaka ku ta pidi pa ekspropiá.

E tribunal a studia e kaso i a yega na e konklushon ku e suma di plaka ku a keda hañá serka e señora no por keda pasá pa e kaso di e hòmber. Den e kaso di e señora, pa kolmo korte no ta mira motibu pa ekspropiá e suma di plaka di 4539,32 euro. Pues e señora a keda ku e plaka. Tur kos ta indiká ku e señora no tabata sa nada di droga.

Esaki ta nifiká ku e hòmber si tin di saka e suma di 10.700 euro.

####

Homoseksual obligá di a transportá droga

Harlememeer – Un homoseksual skondí, esta ku hopi hende no sa ku e ta homoseksual, a hañ’é obligá di transportá droga pa dos narko, pa motibu ku nan a menas’é ku si e no transportá droga pa nan, nan lo bisa su mama ku e ta homoseksual. E persona aki ku no tabata ke pa su mama sa ku e ta homoseksual,a bai e dil, pero a kai den gara di hustisia na Ulanda.

Durante tratamentu di e kaso den korte na Ulanda, e akusado a trese dilanti ku dos hòmber a aserk’é na Kòrsou ku òrdu pa e transportá droga pa Ulanda.

El a duna di konosé ku esei ta algu ku el a nenga i no tabata ke a hinka su kurpa aden. Pero e dos hòmbernan aki a pone preshon formal riba e akusado, dor di bisa ku si e no koperá ku e transporte di droga aki, nan lo bisa su mama ku e ta homoseksual.

Banda di esei nan a menasá e akusado aki tambe ku nan lo hasi su mama algu si e no ke bai e dil di droga.

Pues e hòmber aki a haña su mes den un situashon ku e no por a kontrolá su mes mas. Pues aki e ta papia di forsa mayó síkiko.

E preshon a bira mas serio ainda ora ku e dos hòmbernan a kousa un aksidente den tráfiko ku su outo, ora ku intenshonalmente nan a bin dal den su outo. Despues nan ta kibra den su outo i hòrta su kosnan.

Ora ku e no por a soportá mas el a disidí di pasa droga. E dos hòmbernan aki a pone preshon pa e pasa 8 kilo di koka pa Ulanda.

Pero fiskal no ta kere e historia i a trese dilanti ku for di e dokumentu di Curaçao Road Services, no ta indiká ku aki ta trata di un ‘hit and run’, pero esun  ku a aksidentá den e outo di e akusado ta konosí.

Ku esaki e fiskal ke bisa ku historia di e akusado no tin pia pa para ariba.

Nan a sigui bèl e akusado aki te dia ku el a tuma aden pa pasa e droga. E ta pasa e droga i e ta keda gará na Schiphol.

Despues di un motivashon amplio di fiskal e ta yega na un demanda di 431 dia di kua 180 dia kondishonal.

E tribunal a motivá nan desishon i a yega na 24 luna kastigu di prizon di kua 12 luna kondishonal.

####

akusado femenino ta bai fakansi serka su ruman muhé i kai será

Amsterdam – Kambio di deklarashon di mula femenino kurasoleño a pone ku korte no a kere mas. Esaki a pasa ku un mula femenino kurasoleño ku finalmente a keda kondená na 24 luna di prizon pa importashon di 3.5 kilo di koka na Ulanda via di Schiphol.

E kaso a kuminsá ku un disputa riba e echo ku a dura kasi 3 aña pa trese e kaso aki den korte ku ta un kaso simpel ku no mester a tuma mas ku 10 luna di investigashon. Tabatin un persona ku fiskal na Ulanda tabata ke a tende aki na Kòrsou, pero kada bes ku e mula femenino duna un nòmber i esaki keda investigá, ta resultá ku e persona ei no ta biba na e adrès ku a keda duná, òf e nòmber no ta bon.

E tribunal ku a trata e kaso ta di opinion ku e simpel echo aki no por pone ku un kaso simpel di importashon di koka na Ulanda mester a dura kasi 3 aña pa yega na un veredikto.

E mula a biaha for di Kòrsou pa Ulanda dia 5 di yüni 2012. E buelo a sali Kòrsou, pasa Aruba i sigui pa Schiphol. Einan e tim di duana tin kachónan ku ta pasa banda di tur e maletanan i un di e kachónan tabatin hopi interes pa dos maleta koló bèrdè.

E persona di duana a notifiká marechaussee ku a para wak ken ta kue e maleta. Akinan e mula kurasoleño hende muhé a pasa man kue su dos maletanan i mesora el a keda aserká pa e outoridatnan na Schiphol.

Ora a puntra e mula serka ken el a haña e maleta, el a bisa ku ta un konosí di su ruman a pidié bai ku e maletanan p’e.

E mes a bai Ulanda pa keiru serka su ruman muhé ku ta biba na Rotterdam. Ora ku e tim di Schiphol a pidi e persona aki pa saka su pañanan for di e maleta, a resultá ku e maleta a keda hopi pisá.

A pasa a maleta den mashin di scan i a bin tuma nota ku den e bandanan di maleta tabatin pakinan skondí. Ora ku a saka e pakinan a bin tuma nota ku ta trata di kokaina. Tabata 16 paki ku a pisa na total 3536,1 gram di koka.

Akinan e kurasoleño a bisa ku e no tabata sa ku ta tin koka den maleta, pero na mes momentu su deklarashon  a kambia tambe i a kuminsá menshoná un nòmber di un hende ku por sierto ta esun ku ta tras di e maleta.

Ulanda a manda pidi Kòrsou koperashon hudisial pa investigá e persona aki, pero sea nòmber no ta kuadra òf adrès, pero no por a lokalisá e hende ku tabata keda buská.

Esaki a trese kuné ku e tribunal ta konvensí ku e mula femenino kurasoleño aki a kuminsá kambia su deklarashon a propósito i esaki ta duna nan di pensa ku sin mas e tabata sa kiko e ta hasiendo.

Fiskal a pidi un kastigu di 24 luna prizon. E tribunal a kuestion na e echo ku e kaso a dura hopi promé ku yega na un veredikto i a bisa ku komo sanshon nan ta baha e kastigu.

Pero ounke ku e fiskal a pidi 24 luna, e tribunal ta di opinion ku 32 luna ta na su lugá pa e mula aki, pero komo sanshon pa ministerio públiko ku a tarda di trese e kaso dilanti, nan ta kondená e mula na 24 luna igual na e loke ku e fiskal a pidi.

Na mes momentu tambe a kita e suspenshon di detenshon, loke ku ta krea e posibilidat ku e por keda arestá kada momentu di nobo pa e kaba di sinta su kastigu.