KOMUNIKADO DI POLIS 29 di mart 2015

CURACAO — Djadumingu 29 di mart 2015 alrededor di 15.40’or di atardi, Sentral di polis a risibí notifikashon di un kaso di hinkamentu serio ku a tuma lugá patras di un “sloperij” na Sta. Catharinaweg. Na yegada di e unidat, ningun hende na e sitio por a splika polis kiko a pasa. Mesora a dirigí un unidat pa poliklínika di St. Elisabeth hospital, unda e patruya a komprondé ku un outo partikular a bin baha un hòmber ku hinka serio na altura di su barika i despues move for di e sitio. Polis ta investigando e kaso aki.

###

CURACAO — Djadumingu 29 di mart 2015 alrededor di 03.45’or di mardugá, un hòmber a kore yega warda di polis na Rio Canario. Na momentu ku el a baha for di outo, el a dal abou. Polisnan ku tabata na warda a bai wak mesora kiko ta pasando i a konstatá e hòmber drumi abou tur na sanger. E tabatin herida di un hinka bou di barika. Mas leu e víktima a indiká ku el a keda hinká na Brievengat. A pidi presensha di ambulans ku a transportá e víktima ku urgensha pa poli. Polis a bai na e sitio unda e hòmber a indiká ku el a wòrdu hinká, pero no a topa nada partikular. E kaso ta sigui den investigashon.

###

CURACAO — Djasabra 28 di mart alrededor di 17.15’or, polis a detené banda di un kas na Roi Santu, e hòmber E.G.J. de W. di 22 aña di edat nasé na Kòrsou pa ladronisia di vehíkulo. Algun ratu promé polis a risibí notifikashon ku den Montaña Abou lo mester tabatin un tipo ku tabata plumando un outo. Na yegada di e unidat, e sospechoso lo mester a sali kore, pero djis un ratu despues e patruya a logra detené. A konfiská e vehíkulo tambe ku e sospechoso tabata plumando. Despues di a presentá E. de W. dilanti di un fiskal ouksiliar, el a keda enkarselá pendiente di mas investigashon.

###

CURACAO — Djabièrnè 27 di mart 2015 alrededor di 1’or di mèrdia, personal di e tim di atrako a detené e hòmber G.G.M.G. di 18 aña di edat nasé na Repúblika Dominikana en konekshon ku un atrako ku a tuma lugá dia 14 di desèmber 2014 na un Supermarket riba Cas Coraweg. E detenshon a tuma lugá na e ofisina di Atrako-Tim na Rio Canario. E sospechoso a keda presentá dilanti di un fiskal ouksiliar ku a ordená su enkarselamentu pendiente di mas investigashon