OFISINA DI PAGA BO BUT KU ORARIO NAN ÈKSTRA I MAS SERKA DI BO

0
1054

WILLEMSTAD, Curacao (OM) — E fin di aña aki tambe Ofisina di Paga bo But lo ta habrí orarionan i dianan èkstra pa asina sirbi komunidat mihó i fasilitá siudadanonan ku tin but habrí, pa paga esaki asta pafó di ora di trabou. Ademas di esaki, banda di e lokalidat di Ofisina di Paga bo But na Waaigat, pa e periodo di fin di aña aki tin algun posibilidat pa riba fechanan spesífiko pasa paga butnan habrí na e wardanan di polis di Montaña, Punda i Barber.

E orarionan fiho di Ofisina di Paga bo But ta di 7:30 AM pa 11:30 PM i di 1:30 PM pa 4:30 PM.

Banda di esaki e funshonarionan di Ofisina di Paga bo But lo ta presente na warda di polis na Barber riba djadumingu 15 di dezèmber di 9:00 AM pa 12:00 PM. Riba djárason 18 di dezèmber funshonarionan di Ofisina di Paga bo But lo tei na warda di polis Montaña di 6:00 PM pa 9:00 PM.

Riba djaweps 19 di dezèmber lo por paga but tambe na warda di polis na Punda di 6:00 PM pa 9:00 PM.

Djabièrne 20 di dezèmber Ofisina di Paga bo But na Waaigat mes lo ta habri nònstòp di 7:30 AM te ku 4:00 PM. Riba e djalunanan 23 i 30 di dezèmber Ofisina di Paga bo But
lo ta habrí nònstòp for di 7:30 AM te ku 7:00 PM.

Naturalmente banda di paga but, durante di e orarionan ariba menshoná por hasi uso di e
oportunidat tambe pa haña informashon tokante but i drenta areglo di pago. Ofisina di Paga bo But ta situá na Waaigat, p’ariba di ofisina di Curoil riba Abraham Chumaceiro Bulevar.

Ministerio Públiko ta invitá tur siudadano ku tin butnan habrí, pa hasi uso di e orarionan èkstra aki pa asina pasa paga debenan habrí.

Ta bon pa tene kuenta ku na momentu ku no kumplí ku debenan di but habrí, e debenan enkuestion ta sigui subi. Ademas, na momentu di kòntròl di tráfiko, personanan ku tin but habrí ta kore riesgo ku nan mester paga esaki mesora. E konseho ta pues, paga bo but na tempu i evitá malkontentu.